خلصت ثانوية عامة وعاوز تكمل دراستك في ألمانيا؟
مجموعك فوق ال 75%؟
الفيديو ده ليك:
السلام عليكم!
قبل ما نبدأ: مفيش حاجة في ألمانيا اسمها مصاريف الدراسة 10 آلاف يورو في السنة. اللي قال لك كده مش فاهم.
نبدأ بقى!
الثانوية العامة المصرية مُعترف بيها في ألمانيا.
لو عاوز تيجي بعدها مباشرة لاستكمال الدراسة الجامعية، لازم تدرس سنة كمان في حاجة اسمها Studienkolleg. ليه؟ لأنك درست 12 سنة من أول أولى ابتدائي، وهنا في ألمانيا بيدرسوا 13.
أما لو دخلت الجامعة في مصر سنة، أي جامعة!، ونجحت فيها، فمبروك، أنت كده مش محتاج الـ Studienkolleg.
طب تعمل إيه بقى في السنة دي؟
السنة دي ممكن تستغلها استغلال ممتاز هتعرفه معانا في الفيديو.
بس الأول إيه هي مميزات الدراسة في ألمانيا غير طبعاً الفرق التكنولوجي الكبير بين مصر وألمانيا؟
أولاً: التعليم هنا شبه مجاني. السمستر بحوالي 300 يورو! شاملين مصاريف مواصلاتك داخل المدينة أو الولاية كلها!
ثانياً: عندك فرص تدريب مدفوع الأجر في أكبر الشركات في العالم أثناء دراستك!
ثالثاً: بعد ما بتخلص الدراسة، بتاخد إقامة سنة ونصف للبحث عن عمل في ألمانيا أو أي دولة في الاتحاد الأوروبي!
رابعاً: تأجيل الجيش لحد ما تخلص الماجيستير!
خامساً: بعد ما تخلص دراسة بتكون خلصت نص فترة الحصول على الجنسية الألمانية!
سادساً: بتاخد الإقامة الدايمة بعد 21 شهر من شغلك بعد التخرج.
وأخيراً: لو لا قدر الله سقطت في مادة، مش هتدفع فلوس علشان تعيد الامتحان تاني!
أما لو هتدرس هندسة، ففيه ميزة تانية هتعرفها في آخر الفيديو!
طيب محتاج إيه علشان آجي أدرس في ألمانيا؟
أولاً: اللغة.
أغلب الجامعات بتطلب لغة ألمانية، بس فيه أكثر من جامعة بدأوا يفتحوا فرصة إما إنك تدرس سنين الكلية كلها بالانجليزي، أو إنك تدرس أول سنة بالانجليزي، وتبقى محتاج يكون معاك شهادة اللغة قبل ما تدخل سنة تانية.
نبدأ باللي طالبين ألماني لأنهم الأغلبية:
محتاج تخلص مستوى B2 يا بطل. ده في العادي بيخلص في حوالي تمن شهور لو شديت حيلك شوية. أنت بقى معاك سنة كاملة تخلصه فيها، اللي هي سنة أولى في الجامعة في مصر.
ثانياً: مبلغ التأمين. حوالي 10 آلاف يورو اللي بيقولوا عليهم. ده مش مصاريف جامعة، ولا الحكومة مش بتاخد منه حاجة خالص. ده بيتحط في حساب مقفول باسمك في بنك ألماني، وبيطلع لك منه كل شهر جزء منه، بحيث على آخر السنة تكون كل الفلوس اللي فيه طلعت لك. إيه لازمته بقى؟ علشان يتأكدوا إن معاك اللي يكفي مصاريفك.
طيب هل فيه اختيارات تانية بدل مبلغ التأمين ده؟
اه، فيه بديلين:
الأول: منحة، سواء من مؤسسة مصرية، أو من مؤسسة ألمانية لو أنت طالب متفوق.
الثاني: إن يكون لك قريب أو حد معرفة عايش في ألمانيا يعمل لك وثيقة ضمان مالي. دي للأسف مش سهلة، لأنه بيفضل مش عارف يتصرف في جزء من فلوسه لحد ما أنت تخلص دراستك.
في العادي لو اشتغلت جنب دراستك، زي ما كل الطلبة الألمان بيعملوا، فأنت تقدر تغطي نصف مصاريفك الشهرية على الأقل، وأنت وشطارتك.
طيب أبدأ منين؟
خطوتين لازم تعملهم مع بعض:
ابدأ بمراسلة الجامعات على طول، واسألهم عن اللي بيطلبوه. كل جامعة بيبقى فيها قسم مخصوص للطلبة غير الألمان، مسؤول بس عن إنه يرد على إيميلك!
وحاول تجيب موافقة مشروطة. يعني الجامعة بتديك موافقة إنك تبدأ دراسة معاها بعد سنة، بشرط إنك تكون خلصت B2 في الألماني، وتكون نجحت في سنة أولى في جامعتك
وفيه هنا مفاجأة حلوة!
لو كليتك اللي دخلتها في مصر كانت في نفس المجال اللي اتقبلت فيه في ألمانيا، فالمواد اللي درستها في مصر ونجحت فيها، بتتعادل في ألمانيا ومش بتدرسها تاني، وده بيقصر عليك مشوار دراستك ويسهل عليك أول سنة على الأقل.
طيب أبدأ أتعلم ألماني إزاي؟ شوف الفيديو ده، علشان تبدأ صح وتتجنب تكرار الأخطاء اللي وقع فيها غيرك.
وأول ما توصل ألمانيا يا بطل، إبعت لي ونتقابل، وأنا عازمك على شاورمة تركي، اسمها هنا دونر.
لو عاوزين فيديوهات أكتر عن الدراسة في ألمانيا، اكتبوا في التعليقات، واشتركوا في القناة علشان تعرفوا أول ما الفيديو ينزل!
إيه هي بقى الميزة الزيادة للي هيدرسوا هندسة؟
إنك ممكن تعمل مشروع تخرجك في المجالات المتقدمة زي شغل الدرونز والـ swams أو حتى في المجالات العسكرية، من غير ما تحتاج موافقات أمنية ولا تعاني من الجمارك علشان القطع المستوردة من ألمانيا توصلك. أنت أصلاً في ألمانيا :D
سلام عليكم!