الدراسة في ألمانيا - الجزء الثاني

في الفيديو اللي فات اتكلمنا عن الطريقة الأولى للدراسة الجامعية في ألمانيا بعد الثانوية، لو لسه ماشفتوش، شوفه.

النهارده إن شاء الله هنتكلم عن طريقين تانيين، وفي آخر الفيديو هنتكلم عن مزايا وعيوب كل طريق

السلام عليكم

قبل ما أبدأ، معلومة مهمة نسيت أقولها في الفيديو اللي فات: البكالوريوس في ألمانيا ثلاث سنين، حتى في الهندسة. الطب هو الاستثناء الوحيد. 6  سنين بردو :D

لو بعد ما خلصت ثانوية عامة على طول عاوز تسافر تكمل دراستك في ألمانيا، وأنت لسه مش معاك ألماني، فده بردو ممكن.

ساعتها أنت محتاج فيزا دراسة لغة.

الحصول عليها سهل. محتاج تسجل في كورس مكثف – على الأقل 18 ساعة أسبوعياً – ويكون معاك إثبات إنك تقدر تغطي مصاريفك لمدة الكورس، وده ممكن تثبته بأكتر من طريقة:

- الحساب المقفول بـ 10 آلاف يورو في السنة، فلو حاجز كورس لمدة 6 شهور، فأنت محتاج نصف المبلغ فقط

- منحة دراسية

- وثيقة ضمان مالي، زي ما شرحناها في الفيديو اللي فات

- أو إثبات إن والديك يقدروا يغطوا مصاريفك في فترة الكورس، وإقرار منهم بالتكفل بمصاريفك في الفترة دي.

خلال فترة دراسة اللغة، ممكن تشتغل إما Minijob، ودي دخلها الشهري 450 يورو معفيين من أي ضرايب، أو تشتغل part time، لحد 20 ساعة أسبوعياً، ودي دخلها على حسب الشغلانة. ممكن طبعاً تشتغل freelancer  في أي شغلانة أونلاين، ودي بردو على حسب الشغلانة وحسب مهاراتك.

أثناء ما أنت في ألمانيا، بتراسل الجامعات الألمانية، وتجيب قبول من أي جامعة ، والأحسن تجيب قبول من أكتر من جامعة.

بس بما إنك لسه معاك ثانوية عامة، ومادرستش سنة في الجامعة في مصر، فبتحتاج تدخل الـ Studienkolleg، الناس في مصر بتسميها السنة التحضيرية.

بعد ما تخلص مستوى B1، بترجع مصر، تقدم على فيزا دراسة في الجامعة، وبتاخدها وتركب الطيارة وتنورنا هنا  على الـ Studienkolleg.

الـ IG  مش بيحتاجوا Studienkolleg، بس لازم يكونوا خلصوا B2.

الطريق التاني إنك تخلص سنة أولى في الجامعة في مصر من غير ما تدرس لغة ألمانية، وتجيب بعدها قبول مشروط باللغة من جامعة في ألمانيا، وتيجي تدرس اللغة هنا، وساعتها مش بتحتاج بعد ما تخلص دراسة اللغة إنك ترجع مصر تاني تجيب فيزا الدراسة لأنك أصلا جي بفيزا دراسة.

إيه هي مميزات وعيوب كل طريقة؟

الطريقة الرئيسية، إنك تخلص سنة في الجامعة في مصر ومعاها B2، فدي فيها كذا ميزة:

أولاً، إنك حاطط رجلك في جامعة في مصر، فلو لا قدر الله ماتوفقتش هنا في ألمانيا، تقدر ترجع تكمل دراستك في مصر عادي.

 في خلال الفترة دي بتبقى عامل حاجة اسمها وقف قيد في الجامعة المصرية.

ثانياً، إنك بتبدأ دراسة في الجامعة من أول يوم، فأنت مشوار دراستك كله ثلاث سنين لحد ما تخلص الدراسة.

أما العيوب، فالعيب الأول إنك في أولى جامعة في مصر بتبقى محتاج تنجح في السنة دي، ومحتاج كمان تخلص كورس اللغة، وده محتاج حد عنده التزام وجدية عالية.

العيب التاني إنك بتبدأ الدراسة في ألمانيا مع قفزتين جداد عليك: الأولى هي الحياة في بلد جديدة بنظام جديد – إحم ... بنظام أصلاً ! وإنك شايل مسؤولية نفسك بالكامل، أكلك وشربك ونومك وتخليص ورقك، وكمان جزء من مصاريفك لو بتشتغل أثناء الدراسة.

الحمد لله مع زيادة عدد المصريين والعرب هنا، فأنت غالباً هتلاقي مساعدة، والناس هنا في الأغلب بتحاول تسهل على بعض. نادر جداً أما تلاقي حد مصري عاوز يتوهك. موجود طبعاً، لكن الحمد لله نادر.

لكن خلينا نقول إن نجاحك في أول سنة في الكلية في مصر زائد نجاحك في إتمام مستوى B2، قبل ما تيجي ألمانيا، ده عربون جديّة، والناس اللي عندها القدر ده من الالتزام غالباً بتقدر تكمل مشوارها في ألمانيا زي السكينة في الحلاوة.

الطريقة التانية اللي هي إنك تيجي هنا تدرس لغة وأنت لسه مش معاك قبول جامعة، دي فيها كذا ميزة:

الأولى: إنك بتيجي تجرب حياة الغربة والعيشة لوحدك والإنفاق جزئياً على نفسك، بس أنت في نفس الوقت ماعندكش غير مسؤولية واحدة وهي كورس اللغة.

الميزة التانية إنك لما بتبدأ دراسة في الـ Studienkolleg  أو الجامعة، بتبقى خلاص فهمت نظام البلد على مهلك، وعارف راسك من رجليك، وعندك قدر معقول من المعارف والصداقات.

الميزة الأخيرة هو إن تعلمك اللغة وأنت في البلد نفسها بيبقى غالباً أسرع بكتير، بشرط تتجنب خطأ كارثي بيقع فيه بعض اللي بييجوا هنا يدرسوا، هاقول لك عليه في الآخر.

العيب الرئيسي بقى هو إنه بيطوّل مشوار دراستك في ألمانيا على الأقل سنة ونصف. نص سنة علشان B1 ، وسنة في الـ Studienkolleg.

وبما إن تطويل المشوار يعني زيادة مصاريف، فده بردو معناه إنه مشوار مكلّف أكثر مادياً.

العيب الثالث إنك محتاج ترجع مصر تعمل فيزا الدراسة، وساعتها لازم يكون معاك تأجيل للجيش علشان تعرف تيجي ألمانيا، وتأجيل الجيش يعني تكون متسجل في جامعة في مصر وعامل وقف قيد.

الطريقة الثالثة اللي هي إنك تخلص سنة أولى في الجامعة في مصر، من غير لغة، وتيجي ألمانيا تدرس اللغة وتكمل بعدها في الجامعة، فدي فيها مميزات الطريقة الأولى كلها، بس فيها عيب:

إنك هتحتاج فترة زيادة في ألمانيا، اللي هي لدراسة اللغة، وده معناه تكلفة أكبر.

بس الميزة إنك هتدرس اللغة هنا في ألمانيا، فهتتعلمها أسرع، ومش هيبقى وراك حاجة تانية تعملها.

المكانين دول مهمين جداً لأي حد عاوز يدرس في ألمانيا:

- جروب الدارسين في ألمانيا

- Uniassist

لو عندك أسئلة، سيبها في التعليقات، واشترك في القناة علشان توصلك إشعارات الحلقات الجديدة

الخطأ الكارثي اللي بيعمله بعض اللي بييجوا يدرسوا اللغة هنا في ألمانيا إنهم من أول يوم بيدوروا على شلة مصريين، ويقضوا أغلب وقتهم مع بعض، فبيضيعوا على نفسهم فرصة تسريع تعلم اللغة في وسط مش بيتكلم غير ألماني. طيب يا حبيبي ما كنت تقعد تدرسها في مصر مع أصحابك. عليك بإيه من التكاليف دي كلها؟